Հաճախասրտություն. armeniamedicalcenter.am

Հաճախասրտությունը՝ տախիկարդիան, սրտային ռիթմի տարածված խանգարում է, նրա հաճախացումը /հաճախ մեկ րոպեում 90-ից ավելի սրտի կծկումներով/:

Այն ախտանշան է, որը լինում է ֆիզիկական, հոգեբանական լարվածության կամ որևէ հիվանդության ժամանակ և՛ առողջ, և՛ հիվանդ մարդկանց մոտ:

Պատճառները

• Անսովոր կամ բարձր ֆիզիկական ծանրաբեռնվածությունը,
• Ուժեղ սթրեսը,
• Բարձր ջերմաստիճանը, տոթը,
• Սուրճի կամ այլ էներգետիկ ըմպելիքների չարաշահումը,
• Դիրքի կտրուկ փոփոխությունը:

Այս բոլոր դեպքերում վիճակն արագ կարգավորվում է, և բուժառուն իրեն առանձնապես վատ չի զգում:

Այլ բան է, երբ հաճախասրտության պատճառը լուրջ հիվանդությունն է.

 

• Զարկերակային հիպերտենզիան
• Սրտի արատը
• Կարդիոսկլերոզը
• Սրտամկանի ինֆարկտը
• Տենդը վարակի ֆոնի վրա
• Գլխուղեղի որոշ ախտաբանություններ

Հաճախասրտության ախտանշանները․

• Սրտում ռիթմի ընդհատումները, երբ ֆիզիկապես զգացվում է, որ ասես սիրտը ներս է ընկնում,
• Հևոց սովորական իրավիճակներում, օրինակ, թեթև ֆիզիկական աշխատանքից,
• Ցավի առկայությունը,
• Ուշագնացությունը, դրան մոտ վիճակը կամ գլխապտույտը:

Առիթմիան լինում է թեթև և կարճատև, բայց կարող է նաև տևել երկար:

Հաճախասրտության վտանգավորությունը

Առողջ մարդու մոտ այն վտանգավոր չէ, իսկ հիվանդների մոտ կարող է շատ վտանգավոր լինել:

Այն հղի է բարդություններով.

• Սրտային անբավարարության զարգացում,
• Գիտակցության կորուստ,
• Թրոմբների առաջացման վտանգի բարձրացում,
• Սրտային նոպաներ,
• Ինսուլտի զարգացում։

Երբեմն հաճախասրտությունը դիտվում է դեռահասների մոտ, երբ օրգանիզմի աճը խիստ ակտիվ է, բայց ոչ բոլոր օրգան-համակարգերն են հասցնում այդ տեմպին: Սովորաբար դա ժամանակի ընթացքում անցնում է:

Ախտորոշումը

Անհրաժեշտ է դիմել սրտաբանի, առիթմոլոգի, որոնք անհրաժեշտության դեպքում կուղարկեն համապատասխան մասնագետների մոտ:

Անամնեզի հավաքումից հետո կատարվում են մի քանի հետազոտություններ՝ էլեկտրասրտագրություն /ԷՍԳ/, ԷՍԳ ըստ Հոլտերի, էխոսրտագրություն, էլեկտրոֆիզիոլոգիական հետազոտություններ, որոնք նշանակվում են միայն կոնկրետ հիվանդությունների դեպքում:

Իրականացվում են նաև օրգանիզմի ընդհանուր վիճակի հետազոտություններ: Երբեմն արվում են նաև հորմոնալ, ՄՌՏ և այլ հետազոտություններ:

Մոտեցումներն անհատական են։

Բուժումը

Բուժումը բաժանվում է երկու մասի՝ դեղորայքային և վիրահատական:

Դեղերից առաջին հերթին օգտագործվում են սրտի ռիթմը կարգավորող դեղեր, որոնք պետք է ընդունել բացառապես բժշկի նշանակմամբ: Նշանակվում են նաև հանգստացնող դեղամիջոցներ՝ դեղորայքային կամ բուսական: Դրանք դրական ազդեցություն են ունենում, եթե պատճառը սթրեսն է:

Բուժման առանցքային մեթոդը վիրահատականն է. տվյալ խնդրից կախված առաջարկվում է ռադիոհաճախական կաթետերային աբլացիա, արհեստական կարդիոստիմուլյատոր, որոշակի գեղձի կամ նրա հատվածի հեռացում: Այս միջոցներն օգտագործվում են, եթե առկա են սրտի կառուցվածքա-գործառույթային փոփոխություններ կամ հորմոնալ խանգարումներ:

Եթե առիթմիայի պատճառ են հանդիսանում որոշ հիվանդություները /անեմիա, լեյկեմիա և այլն/, ապա բուժումն ուղղված է հիմնական հիվանդության դեմ:

Առաջին օգնությունը տան պայմաններում։

Առիթմիայի դեպքում պետք է հիվանդին ապահովել լիարժեք հանգիստ, բացել պատուհանները, տալ թույլ հանգստացնող միջոցներ:

Օգնում է նաև շնչառության վերահսկումը՝ խորը ներշնչել, պահել շնչառությունը, ապա դանդաղ արտաշնչել:

Ճակատին կամ դեմքին կարելի է դնել սառը թրջոց կամ պարզապես լվանալ սառը ջրով: Երբեմն այս միջոցառումները բավական են լինում սրտի ռիթմը կարգավորելու համար: Եթե վիճակը չի կարգավորվում, անհրաժեշտ է շտապօգնություն կանչել:

Կանխարգելումը

Անհրաժեշտ է վարել առողջ ապրելակերպ.

• ճիշտ սնվել, բացառել ճարպոտ, քաղցր, դժվարամարս սնունդը,
• վերահսկել վիտամինների և հանքային աղերի քանակն օրգանիզմում,
• ակտիվ կյանք վարել, մարզվել,
• խուսափել հոգեբանական լարվածությունից։

Հարցեր, պատասխաններ, մեկնաբանություններ